PINDA AKABIDHI TUZO YA MWANAMKE BORA

Waziri Mkuu, Mizengo Pinda akizungumza katika hafla  ya kutoa tuzo ya Global Publishers iliyotolewa kwa mwanamke bora nchini mjini Dodoma Machi 29, 2014. Wengine pichani  kutoka kulia ni Mkurugenzi wa Global Publishers, Eric Shigogo, Mkuu wa Wilaya ya Dodoma Mjini, Lephy Gembe na Naibu Waziri wa Maendeleo ya Jamii, Jinsia na Watoto, Pindi Chana. (Picha na Ofisi ya Waziri Mkuu)

Waziri Mkuu, Mizengo Pinda akimkabidhi Tuzo ya Mwanamke Bora wa Mwaka 2014 ya Global Publishers, Profesa Anna Tibaijuka  mjini Dodoma machi 29, 2014. Katikati ni Mkurugenzi wa Global Publishers, Eric Shigongo. (Picha na Ofisi ya  Waziri Mkuu)

Waziri Mkuu, Mizengo Pinda akiwa katika picha ya pamoja na washindi wa Tuzo ya Mwanamke Bora wa Mwaka 2014 ya Global Publishers baada ya kuwatunuku tuzo zao mjini Dodoma Machi 29, 2014.  Kutoka kushoto ni Anna Abdallah ambaye alipokea kwaniaba ya Dr. Asha Rose Migiro, Anne Kilango, Maria Kham na Profesa Anna Tibaijuka. (Picha  na Ofisi ya Waziri Mkuu)

NDEGE WALIOVAMIA KISIWA CHA MSIRA KILICHOKO NDANI YA ZIWA VICTORIA

Hawa ndio ndege waliovamia kisiwa cha msira, wanadaiwa kuleta madhara makubwa kwa wakazi wa kisiwa hichi kilichoko ndani ya ziwa Victoria, wanadaiwa kusabababisha magonjwa mbalimbali yakiwemo ya kuharisha na madhara mengine mengi.

MRADI WA DASIP WATOA ZANA ZA KILIMO NA VITENDEA KAZI VINGINE

 Moja ya vifaa vilivyotolewa na mradi wa uendelezaji kilimo nchini (DASIP), hiki ni kifaa cha kupanda mpunga.

 Mkuu wa mkoa wa Kagera Kanali mstaafu Fabian Massawe akiwasha moja ya zana za kilimo zilizotolewa na mradi wa DASIP.

Serikali  inaendelea kuboresha na kuimarisha kilimo kwa wananchi wa mkoa wa Kagera kwa kutoa vifaa vya kisasa vya kilimo kupitia mradi wa uwekezaji katika sekta ya kilimo Wilayani (District Agricultural Sector Investment Project – DASIP)

Serikali kupitia Mradi wa DASIP imetoa zana za kisasa za  kilimo na vifaa mbalimbali kwa ajili ya kutekeleza kilimo cha kisasa na chenye tija katika Halmashauri saba za Wilaya za Mkoa wa Kagera ili ziweze kuinua uchumi wa wananchi wake kupitia kilimo cha kisasa.

Zana na vifaa vilivyotolewa na serikali kupitia mradi wa DASIP mkoani  Kagera ni  matrekta madogo (Powertllers)manne, Mashine za kupandia mpunga (Transplanters) 4, Kasiki (Cash boxes) 18 za kutunzia fedha kwenye SACCOS vijijini, na Kompyuta 6 kwaajili yakutunzia kumbukumbu za kilimo za wakulima.

Gharama ya zana na vifaa hivyo vya kilimo kwa jumla ni shilingi milioni 174,000,000/= vikiwa na mchangunuo ufuatao, trekta ndogo 4 za kilimo kila moja sh 5,000,000/=, Mashine za kupandia mpunga 4  kila moja sh 13,000,000/=, Kompyuta 6 kila moja sh 2,000,000/= na kasiki 18 kila moja sh 500,000/=.

Mkuu wa Mkoa wa Kagera Mhe Massawe akikabidhi zana na vifaa vya  kilimo kwa Wakurugenzi watendaji wa halmashauri  aliishukuru serikali kutoa zana hizo za kisasa ambazo zitawafanya wakulima wa mkoa waKagera  kuzalisha kwa wingi mazao ya chakula na biashara  kwa wakati muafaka.

Aidha kutokana na mradi wa DASIP kuonyesha mafanikio makubwa mkoani Kagera Mhe. Massawe aliiomba serikali kuongeza muda wa mradi huo ambao ulianza mwaka 2006 na kumaliza muda wake mwezi desemba 2013.

“Kama ilivyo miradi mingine mfano TASAF naiomba serikali kuongeza muda wa mradi huu wa DASIP au serikali ifikirie kuanza DASIP II ili kunufaisha wananchi walio wengi mkoani kwetu Kagera kwani mradi huu umekuwa wa tija kwa wakulima wetu,” Alitoa wito Mhe Massawe.

Katika hatua nyingine Mhe. Massawe aliwaasa Wakurugenzi kuhakikisha zana hizo zinakwenda kwa wakulima walengwa ili wazitumie na kuzifanya halmashauri za wilaya kujiongezea mapato ya ndani kupitia kilimo.

Lengo la mradi wa DASIPlilikuwa ni kuchangia katika kupunguza umasikini vijijini kwa kuongeza uzalishaji na tija katika kilimo hatimae kuongeza patola mkulima na uhakika wa chakula katika kaya, aidha, DASIP ni sehemu ya utekelezaji wa mkakati wa kuendeleza sekta na mipango ya kilimo.

Mradi wa DASIP ulikuwa unafanya kazi katika sehemu kuu nne ambazo ni Uimarishaji wa uwezo wa wakulima,  Uandaaji wa mipango ya maendeleo ya kilimo na uwekezaji katika kilimo, Uimarishaji wa vyama vya kuweka na kukopa pamoja na masoko na mwisho ni Uratibu wa mradi wenyewe.

Halmashauri za Wialaya za mkoa wa Kagera zilizonufaika na vifaa vya kilimo kutoka katika mradi wa  DASIP ni Bukoba, Biharamulo, Chato (Mkoa mpya wa Geita), Karagwe, Missenyi, Muleba na Ngara.  Aidha, halmashauri hizo zimeingiza miradi ya DASIP katika bajeti za kila mwaka ili kuhakikisha shughuli zote zilizokuwa zikifanywa na DASIP zinaendelea na kwa ufanisi mkubwa.

KAMPENI YA UBUNGE CHALINZE

 Mgombea Ubunge wa Jimbo la Chalinze kwa tiketi ya CCM,Ridhiwani Jakaya Kikwete akiwasalimia wakina Mama wa jamii ya watu Wafugaji (Wamasai) wakati alipowasili kwenye Kijiji cha Matuli kwa ajili ya kuendelea na Mikutano ya Kampeni zake za kuomba ridhaa ya kuwa Mbunge wa Jimbo la Chalinze.

Mgombea Ubunge wa Jimbo la Chalinze kwa tiketi ya CCM,Ridhiwani Jakaya Kikwete akishiriki kucheza muziki na wananchi wa Kijiji cha Matuli,Kata ya Bwilingu Machi 27, 2014,wakati wa moja ya Mikutano ya Kampeni zake za kuomba ridhaa ya kuwa Mbunge wa Jimbo la Chalinze.

MWILI WA RC TUPA WAWASILI DODOMA

Askari wakiwa wamebeba mwili wa aliyekuwa Mkuu wa Mkoa wa Mara, John Tupa baada ya kuwasili kwenye uwanja wa ndege Dodoma Machi 27, 2014. Marehemu ataagwa kwenye viwanja vya Nyerere Dodoma Machi 28, 2014 kabla ya kusafirishwa  kwenda kilosa kwa mazishi. (Picha na Ofisi ya Waziri Mkuu)

WAZIRI MKUU PINDA MJINI DODOMA

 Waziri Mkuu, Mizengo Pinda akizungumza na Viongozi wa Kampuni ya Africana  Barrick Gold Tanzania, kwenye makazi yake mjini Dodoma  Machi 25,2014. Kutoka kushoto ni Mkurugenzi wa Mawasiliano na Serikali (Director of Government Relations)), Balozi Emmanuel  Ole Naiko, Makamu wa Rais, Deo Mwanyika na Ofisa Mtendaji Mkuu (Chief  Executive Officer ), Brand Gordon. (Picha na Ofisi ya Waziri Mkuu)

 Waziri Mkuu, Mizengo Pinda  na Naibu Waziri wa Nishati na Madini, Stephen Masere  (kushoto kwake) wakizungumza na Viongozi wa Kampuni ya Africana  Barrick Gold Tanzania, kwenye makazi yake mjini Dodoma  Machi 25,2014. Kutoka kulia ni Mkurugenzi wa Mawasiliano na Serikali (Director of Government Relations)), Balozi Emmanuel Ole Naiko, Makamu wa Rais, Deo Mwanyika na Ofisa Mtendaji Mkuu (Chief  Executive Officer ), Brand Gordon. (Picha na Ofisi ya Waziri Mkuu)

Waziri Mkuu, Mizengo Pinda  akiteta na Mbunge wa Bunge Maalum la Katiba, Kingunge Ngombale-Mwiru, Bungeni Mjini  Dodoma Machi 25, 2014. (Picha na Ofisi ya Waziri Mkuu)

HALMASHAURI YA WILAYA YA MISENYI YAWANUFAISHA WATOTO WAISHIO KATIKA MAZINGIRA MAGUMU

Idara ya Maendeleo ya Jamii na Ustawi wa Jamii katika Halmashauri ya Wilaya ya Missenyi Mkoani Kagera imetumia jumla ya Sh.milioni 48,000,900/= kuhudumia watoto mbalimbali waishio kwenye mazingira hataraishi kwenye Halmashauri hii katika kipindi cha mwaka miaka mitatu iliyopita.

Mratibu wa Ukimwi wa Halmashauri ya Wilaya Missenyi, Rwegerera Katabaro alisema hayo mjini hapa kuwa kiasi hicho cha fedha kilitumika kuwalipia karo na kuwanunulia vifaa vya kuandikia wanafunzi 2700 wanaosoma shule mbalimbali za msingi na sekondari katika Halmashauri hii.

Akizungumzia tatizo la watoto kuishi katika mazingira hatarishi, Katabaro alisema baadhi yao wanatoka kwenye familia maskini sana, wachache ni yatima wakati wengine wametelekezwa tu na wazazi wao; hivyo kulazimika kuishi na bibi zao wasio na uwezo.

Kutokana na hali ngumu ya maisha, walezi hao huwashawishi watoto hao kujiingiza kwenye shughuli za vibarua kwa lengo la kuzisaidia familia zao kimaisha.

‘’Baadhi ya watoto hawa ulazimika kufanya vibarua katika mashamba au kujiajiri kwa kuendesha baiskeli kwa kubeba abiria maarufu kama Asecdo’’ alisema Katabaro.

Aidha, Katabaro alieleza kuwa Idara hiyo inakusudia kuimarisha Kamati za kumlinda mtoto katika ngazi mbalimbali na kuwaagiza watendaji wa kata na vijiji kuwatambua watoto wote waishio kwenye mazingira hatarishi au mazingira magumuu katika maeneo yao ili waweze kufuatiliwa.

Kwa mujibu wa Ofisa huyo, Halmashauri ya Wilaya ina jumla ya watoto 5036 waishio katika mazingira magumu, na jumla ya watoto 900 kati yao wanahudumiwa na Halmashauri kwa mwaka, hata hivyo   asasi  zisizo za serikali au za kidini nazo zinatoa mchango mkubwa katika kuwasaidia wanaobaki.

Alisema jamii inawajibu wa kuangalia namna bora ya kuwasaidia watoto wanaoishi katika mazingira hatarishi kwani watoto wa leo ni taifa la kesho, kuachana na tamaduni za kusaidia wakati wa raha

“Jamii ni lazima ibadilike na kuachana na huu utamaduni wa kuchangia katika sherehe tu bali moyo huo utumike  namna ya kuwasaidia watoto hawa’’ alisema Katabaro.

Hata hivyo alisema ili kupunguza athari zitokanazo na janga la UKIMWI  Halmashauri imeandaa mkakati malum kwa kushirikiana na wadau mbalimbali wa ndani na nje ili ifikapo mwaka 2017 athari zitokanazo na janga la Ukimwi zipungue hadi asilimia 30.

Shuguli ya kuitafuta MH370 yasitishwa

Jamaa za abiria wa ndege hiyo wamekumbwa na majonzi makubwa.

Mamlaka ya usalama wa safari za baharini nchini Australia imesema kuwa operesheni ya kuitafuta ndege ya shirika la Malaysia iliyotoweka imesitishwa kutokana na hali mbaya ya hewa na mawimbi makali baharini.

Taarifa zinasema kuwa upepo mkali pamoja na mvua kubwa inayonyesha katika eneo hilo ina maana kuwa ndege hazitoweza kupaa kwa usalama. Mawimbi makali yameilazimisha meli ya jeshi la wanamaji wa Australia kuondoka katika eneo ambalo mabaki yanayodhaniwa kuwa ya ndege hiyo yalionekana hapo jana Jumatatu.
Dr Erik van Sebille, ambaye ni mtaalam wa maswala ya Baharini katika chuo kikuu cha New South Wales mjini Sydney, amefanya utafiti katika eneo hilo la kusini mwa Bahari Hindi kutambua ni wapi na vipi vifusi vinasafirishwa na mawimbi ya bahari. Anasema itakuwa vigumu sana kupata mabaki ya ndege hiyo.

Shughuli ya kuitafuta MH370 imesitishwa

" Ni eneo lisiloweza kukalika duniani, acha niseme. Upepo unaovuma ni mkali sana, mawimbi ni makubwa, ni mojawepo wa mawimbi makubwa zaidi baharini. Unapofika katika eneo hili la kusini, unaanza kuhisi athari za eneo la Antactica kwenye bahari. Hapa tunazungumzia dhoruba kali kali sana hususan wakati huu tunapoingia majira ya kupukutika," anasema Dr. Erik van Sebille.
Kadhalika amesema kuwa vifusi vilivyoenekana hapo jana tayari vimekwishaondolewa katika eneo hilo na mawimbi makali.
"Haitakuwa rahisi kabisa kupata kijisanduku cha kunasa habari. Mawimbi ya eneo hili ni makali na kwa hiyo vifusi ambavyo wametambua kwa sasa huenda vimehamishwa katika kipindi cha majuma mawili au matatu tangu ndege hiyo ianguka-na huenda vimesafiri kilomita alfu moja tayari. Na hii inaifanya vigumu kurejelea utafutaji kwa sababu bahari inabadilika sana hapa-ina vurugu ukipenda."
Hapo awali naibu waziri wa mashauri ya nchi za Kigeni wa China Xie Hangsheng, aliitaka serikali ya Malaysia kutoka ushahidi unaoelezea kuwa ndege hiyo ilianguka katika eneo la Kusini mwa bahari Hindi. Ndege hiyo ilitoweka kwenye mtambo wa Radar zaidi ya majuma mawili yaliyopita.

MAMBO YA KAMPENI YA UBUNGE JIMBO LA CHALINZE

Katibu Mkuu wa Chama cha Mapinduzi (CCM),Ndg. Abdulrahman Kinana akiwa amemuinua mkono Mgombea Ubunge katika Uchaguzi Mdogo wa Jimbo la Chalinze (CCM),Ridhiwani Jakaya Kikwete ikiwa ni ishara ya kumnadi kwa wananchi wa Kata ya Ubena Zomozi huku mvua kubwa ikiendelea kunyesha,wakati wa Mkutano wa Kampeni za CCM zinazoendelea katika Kata mbali mbali ndani ya jimbo la Chalinze.

Katibu Mkuu wa Chama cha Mapinduzi (CCM),Ndg. Abdulrahman Kinana akiwahutubia wananchi na wanaCCM wa Kata ya Ubena Zomozi huku akishangilia kwa shangwe,leo Machi 24,2014.

 Mgombea Ubunge katika Uchaguzi Mdogo wa Jimbo la Chalinze (CCM),Ridhiwani Jakaya Kikwete akiwapungua mkono wananchi na wapenzi wa CCM katika Kata ya Ubena Zomozi,leo Machi 24, 2014.Kulia kwake ni Katibu Mkuu wa Chama cha Mapinduzi (CCM),Ndg. Abdulrahman Kinana.

WAZIRI MKUU MIZENGO PINDA AFUNGA WIKI YA MAJI KWA KUZUNDUA MRADI WA MAJI

Waziri Mkuu, Mizengo Pinda akizindua mradi wa maji wa Mkonze katika Maanispaa  ya Dodoma katika kilele cha wiki ya maji Machi 22, 2014. Kushoto kwake ni Waziri wa Maji, Profesa  Jumanne Maghembe.(Picha na Ofisi ya Waziri Mkuu)

Tuboreshe Rasimu iliyopo

Na Zitto Kabwe

 

Wiki ya Machi 18 - 22, 2014 ilianza kwa siku ya Jumanne Mwenyekiti wa iliyokuwa Tume ya Mabadiliko ya Katiba Jaji Joseph Sinde Warioba aliwaslisha rasmi Rasimu ya Katiba ya Jamhuri ya Muungano wa Tanzania katika Bunge Maalumu la Katiba. Wiki hiyo imeishia kwa siku ya Ijumaa Rais wa Jamhuri ya Muungano ndugu Jakaya Mrisho Kikwete kutoa hotuba kwa Bunge Maalumu. Hotuba zote zimepokelewa kwa hisia tofauti kulingana na msimamo wa kila mtu kuhusu hoja inayoonekana ni kubwa
kuliko zote katika mchakato wa kuandika Katiba Mpya - Muundo wa Muungano. Wale wanashabikia muundo wa Serikali Tatu, walifurahishwa mno na hotuba ya Jaji Warioba. Wale wanaoshabikia muundo wa Serikali mbili walifurahishwa mno na hotuba ya Rais Kikwete. Sikufurahishwa na hotuba zote mbili.

 

Nitaeleza.

 

Moja, hotuba zote mbili zilichukua muda mrefu zaidi kuelezea sura moja tu ya Rasimu ya Katiba nayo ni sura ya Sita inayohusu muundo wa Jamhuri ya Muungano kana kwamba Katiba hii inahusu suala hilo tu. Ni dhahiri suala hili ni kubwa na muhimu kwani linahusu uhai wa Dola yenyewe na siwezi kubeza. Hata hivyo masuala kama Haki za Raia ni muhimu zaidi kwani hata uwe na muundo wa namna gani wa muungano au hata muungano wenyewe kuvunjika, bila ya kuwa na haki za msingi za raia kwenye katiba katiba hizo zitakataliwa tu na wananchi. Huu mtindo unaozuka wa kudhani muundo wa muungano ndio mwarobaini wa matatizo ya ufisadi, matumizi mabaya ya madaraka, ubadhirifu, umasikini, elimu ya hovyo, afya dhaifu, utatufikisha pabaya na hata kurudi tena kuandika katiba kudai haki hizo. Jaji Warioba na Rais Kikwete wameshindwa kuruka kiunzi cha kwamba Katiba ni zaidi ya Muungano.

 

Pili, wote wawili Rais Kikwete na Jaji Warioba wamejenga hoja zao kuhusu miundo ya Muungano wanayopendekeza au kuunga mkono kutokana na misingi ama ya 'malalamiko' au 'hofu'. Jaji Warioba aliorodhesha malalamiko 11 ya upande wa Zanzibar dhidi ya Muungano na malalamiko 10 ya upande wa bara. Kimsingi malalamiko yote ya upande wa bara yanazaliwa na vitendo vya upande wa Zanzibar isipokuwa lalamiko namba vii linalohusu kupotea kwa utambulisho wa Tanganyika katika muundo wa Muungano.

 

Jaji Warioba anajenga msingi wa pendekezo la Tume yake kutokana na kujibu malalamiko au maarufu kero za Muungano na anasema

"....muundo wa Serikali mbili hauwezi kubaki kwa hali ya sasa. Muungano wa Serikali mbili waliotuchia waasisi siyo uliopo sasa...... waasisi walituachia Muungano wa Nchi Moja yenye Serikali mbili, na siyo Nchi Mbili zenye Serikali Mbili". Nukuu hii niliipenda kuliko zote katika Hotuba ya Mzee wangu Warioba.

 

Rais Kikwete alijenga msingi wa maoni yake kwenye hofu za kuwa na Serikali tatu. Hofu hizo ni pamoja na gharama za kuendesha Muungano, kuzuka kwa hisia za Utaifa wa Utanganyika na Uzanzibari, uwezekano wa Muungano kuvunjika kwa kushindwa kuhudumia majeshi na hata Jeshi kuchukua Nchi ikipidi na kutupilia mbali katiba na Serikali ya Muungano kutokuwa na Rasilimali zake. Rais alisema 'Serikali ya Muungano ni egemezi na tegemezi' nukuu ambayo niliipenda kuliko zote katika Hotuba ya Mzee wangu Jakaya Kikwete.

 

Rais Kikwete hakuniridhisha kabisa namna ya kumaliza kero za Muungano kwa muundo uliopo sasa kwani muundo huo umeshindwa kuzimaliza kwa takribani miaka 50 tangu Muungano uundwe. Haiwezekani muundo uliozalisha kero lukuki ndio utarajiwe kuzimaliza kero hizo. Kwa vyovyote vile ni lazima kuwa na muundo mpya lakini kiukweli ni lazima muundo huo mpya ujibu hofu alizoeleza ndugu Rais maana ni hofu za kweli.

Jaji Warioba hakuniridhisha na namna suala la Uraia litakavyotatuliwa kwani kutoa jibu la kubakia na 'kukubali' Nchi mbili halafu uraia mmoja kunaleta mashaka makubwa. Kama tunataka kuwa na Uraia mmoja ni lazima tuwe Nchi moja, hatuwezi kuwa na Nchi mbili uraia mmoja.

 

Vilevile vyanzo vya mapato ya Muungano ni vidogo mno kuendesha dola. Hivyo basi rasimu iliyopo mbele ya Bunge Maalumu ina mapungufu makubwa japo imetoa mapendekezo yatakayomaliza malalamiko ya Muungano.

 

Sasa kazi ya Bunge ni moja tu nayo ni kuboresha rasimu iliyopo mbeleyake ili kumaliza kero za muungano zilizopo na kujibu hoja za hofu za muundo mpya. Hakuna sababu ya kubishana kwenye takwimu za Tume, tume imefanya wajibu wake na sasa Bunge Maalumu nalo litimize wajibu wake.

 

Iwapo kama kweli tunataka kusikia Watanzania wanataka nini kwenye muundo wa Muungano, tusimamishe Bunge na twende tukawaulize kwa kura (referendum). Vingivenyo tuboreshe rasimu iliyopo na iliyotokana na maoni ya wananchi wote kwa kujibu hizo hofu muhimu alizoainisha ndugu Rais na hayo malalamiko muhimu yaliyoainishwa na Tume. Sio kazi ya Bunge Maalumu kutafuta ubora wa hotuba zilizotolewa mbele yetu bali kuona mazuri ndani ya hotuba hizo yasaidie kazi yetu Tuzingatie kuwa tusijenge Nchi kwa kujibu malalamiko na hofu tu maana hofu na malalamiko hayaishi katika dunia inayobadilika kwa kasi sana.

 

Tuamue tunataka kuwa Jamhuri ya Muungano ya namna gani. Nini sababu ya Jamhuri yetu na aina gani ya Tanzania tunataka kujenga. Tuanze kwa kutafsiri sababu ya Tanzania kuwepo na Tanzania gani tunataka kujenga kisha tutunge Katiba itakayowezesha kutufikisha huko tutakapo kufika.

 

Yah: Maadhimisho ya Siku ya Hali ya Hewa Duniani Tarehe 23 Machi, 2014

Kila mwaka tarehe 23 Machi nchi wanachama wa Shirika la Hali ya Hewa Duniani hujiunga na kuadhimisha kuzaliwa kwa Shirika hilo lililoanzishwa tarehe 23 Machi, 1950 kulingana na kauli mbiu. Kauli mbiu ya mwaka huu ni ’Ushirikishwaji wa Vijana katika Masuala ya Hali ya Hewa’- ”(Weather and Climate: Engaging Youth)”.

Katika kuadhimisha Siku ya Hali ya Hewa Duniani (WMO), Shirika la Hali ya Hewa linawahamasisha vijana ulimwenguni kote kujihusisha na masuala ya hali ya hewa, ili kupata maarifa na uelewa wa hatua za kuchukua katika kipindi hiki cha mabadiliko ya hali ya hewa duniani. Hatua hii ya WMO ni muhimu kwa ustawi wa kizazi hiki na kijacho ili kujenga jamii imara hapo baadae.

Siku ya Hali ya Hewa Duniani ni siku ya kutafakari Juhudi zinazofanywa na Wanasayansi Duniani katika kufahamisha Dunia kuchukua tahadhari juu ya mabadiliko ya hali ya hewa duniani na athari zake. Mamlaka ya Hali ya Hewa Tanzania inatoa wito kwa vijana wote kubadilika na kuchukua hatua za kukabiliana na mabadiliko ya hali ya hewa katika kizazi hiki na kuchukua tahadhari ili kizazi kinachokuja waweze kufaidi dunia yenye mazingira bora zaidi. Vijana wote walioko mashuleni  vyuoni na wajasiriamali  washiriki katika kuokoa dunia kutoka kwenye majanga yaletwayo na mabadiliko ya hali ya hewa. Aidha chachu kubwa ni kuhakikisha vijana wanakuwa mstari wa mbele katika kufuatilia taarifa za hali ya hewa zitolewazo na Mamlaka ya Hali ya Hewa nchini.

Kama ilivyo kwa wanachama wengine, Tanzania inaungana nao kuadhimisha siku hii inayofikia kilele tarehe 23 Machi, 2014 kwa kuwakaribisha wananchi wote kutembelea vituo vya hali ya hewa nchini ili kuona shughuli zitolewazo na Mamlaka kuanzia tarehe 21-23 Machi 2014. Aidha, Mamlaka itambelea na kutoa elimu kwa vijana wa baadhi ya shule na vyuo mbali mbali kupitia ofisi zake zilizopo nchini kuanzia tarehe 19-20 Machi 2014. Kutoa statements/makala  za siku hiyo kwenye magazeti, vipindi kwenye radio, na televisheni kuhusu ushirikishwaji wa vijana katika masuala ya hali ya hewa.

Mamlaka inawatakia maadhimisho mema ya Siku ya Hali ya Hewa Duniani

’Ushirikishwaji wa Vijana katika Masuala ya Hali ya Hewa’

(Weather and Climate: Engaging Youth)

  IMETOLEWA NA MAMLAKA YA HALI YA HEWA TANZANIA                                                      

TAARIFA KWA VYOMBO VYA HABARI

UNITED REPUBLIC OF TANZANIA

DIRECTORATE OF PRESIDENTIAL COMMUNICATIONS

Rais Kikwete awasili Dodoma kuhutubia Bunge Maalum la Katiba

Rais wa Jamhuri ya Muungano wa Tanzania, Mheshimiwa Jakaya Mrisho Kikwete, leo, Alhamisi, Machi 20, 2014, amewasili mjini Dodoma kwa ziara ya kikazi ya siku tatu ambako miongoni mwa mambo mengine atakuwa Mgeni Rasmi na atahutubia Bunge Maalum la Katiba kesho, Ijumaa, Machi 21, 2014.

Muda mfupi baada ya kuwa amewasili na kulakiwa na Waziri Mkuu, Mheshimiwa Mizengo Peter Pinda kwenye Uwanja wa Ndege wa Mjini Dodoma, Rais Kikwete ameendesha Kikao cha Baraza la Mawaziri lake kwenye Ukumbi wa TAMISEMI ikiwa ni shughuli yake ya kwanza katika ziara hiyo fupi ya Mkoa wa Dodoma.

Kesho, Ijumaa, Rais Kikwete atakuwa mgeni rasmi na atahutubia Bunge Maalum la Katiba kutokana na mwaliko wa Mwenyekiti wa Bunge hilo, Mheshimiwa Samuel  J. Sitta ambaye alimwalika Rais Kikwete kwa barua yake ya Machi 15, mwaka huu, ambayo ilijibiwa Machi 18, mwaka huu, kwa Rais Kikwete kukubali mwaliko huo.

Mwaliko huo wa Mheshimiwa Sitta kwa Rais Kikwete umetolewa kwa mujibu wa Kanuni ya 7(1) (g) na Kanuni 75 (1) ya Kanuni za Bunge Maalum ambazo zinampa Mwenyekiti wa Bunge Maalum madaraka ya kumwalika Mgeni Rasmi aweze kuhutubia Bunge Maalum.

Mwisho.

Imetolewa na;

Kurugenzi ya Mawasiliano ya Rais,

Ikulu,

DAR ES SALAAM.

20 Machi, 2013

KAMPENI YA CUCHAGUZI MDOGO WA JIMBO LA CHALINZE

 Msanii wa Muziki wa Kizazi Kipya,Sam wa Ukweli akitoa burudani kwa wananchi wakazi wa kijiji cha Misakazi,Kata ya Ubena ndani ya Jimbo la Chalinze leo Machi 20, 2014.Picha na Othman Michuzi.

Mwenyekiti wa Chama cha Mapinduzi Mkoa wa Pwani,Mwishehe Shaban Mlawa akimnadi Mgombea Ubunge katika Uchaguzi Mdogo wa Jimbo la Chalinze (CCM),Ridhiwani Jakaya Kikwete katika Mkutano wa Kampeni za CCM uliofanyika kwenye kijiji cha Misakazi,Kata ya Ubena ndani ya Jimbo la Chalinze leo Machi 20, 2014.Picha na Othman Michuzi.

WARIOBA AWASILISHA RASIMU YA PILI YA KATIBA BUNGE MAALUMU

Mwenyekiti wa Tume ya Mabadiliko ya Katiba, Jaji Joseph Sinde Warioba akiwasilisha Rasimu ya Katiba  mpya mbele ya wajumbe wa Bunge Maalum la Katiba, bungeni mjini Dodoma Machi 18, 2014. (Picha na Ofisi ya Waziri Mkuu)

Waziri Mkuu, Mizengo Pinda akimpongeza Mwenyekiti wa Tume ya  Mabmadiliko ya Katiba Jaji Joseph Sinde Warioba (kushoto) baada ya Mwenyekiti huyo kuwasilisha Rasimu ya Pili ya Katiba Mpya bele ya wajumbe wa Bunge Maalum la Katiba Bungeni Mjini Dodoma Machi 18, 2014.Wengine ni Makamu Mwenyekiti wa Bunge  Maalum la Katiba, Samia Suluhu (kuli), Waziri wa Ardhi, Nyumba na Maendeleo ya makazi, Profesa  Anna Tibaijuka,  Kiongozi wa Upinzani Bungeni, Freeman Mbowe (watatu kushoto) na  watatu kushoto ni Waziri wa Mambo ya Ndani  , Mathias Chikawe. (Picha na ofisi ya Waziri Mkuu)